Category: 食譜

【蒸水蛋】簡單又味美，唔需要太多材料都可有好多唔同變化，但呢道菜易學難精，水溫、蛋水比例、蒸煮時間及火候呢D細節都會對成品有所影響。
參考呢啲貼士，你都可以蒸到豆腐花咁嫩滑嘅水蛋！
做法：
1. 先將一窩水煮滾；
2. 雞蛋、鹽及雞粉放碗內，以同一方向徹底打散，約10分鐘；
3. 注入80°C溫水 (蛋：水比例為 1:1.5 – 2)，繼續打發至均勻；
4. 將蛋液放到薄碟上，撇去蛋上面的一層泡沫，碟上蓋上錫紙，放到已有滾水的窩裡，蓋上蓋，隔水以慢火蒸7分鐘，熄火再焗10分鐘；
5. 最後淋上豉油及蔥花即成。
貼士：
1. 蒸前撇走蛋液泡泡，蛋面便不會出現小孔；
2. 以溫水混入蛋液，可令蒸蛋更嫩滑；
3. 蒸蛋時要注意時間及切忌用猛火；
4. 蒸碟蓋上錫紙，可防止倒汗水令蛋面不平滑。

見尋日唔少 fans 都想趁蘆筍當造煮返味，其實蘆筍有好多食法，例如嫩嘅部份可以做沙律或者清炒，連較老嘅根部都可以用嚟煮湯！今日就教大家處理蘆筍同埋整返道【蘆筍忌廉湯】啦～
將所有蔬菜材料打成湯茸，唔怕小朋友揀食之餘又夠香濃。無攪拌機都唔緊要，可以改為【蘆筍雜菜清湯】，一樣咁好味架！
做法：
1. 材料洗淨，煙肉、洋蔥切絲，蘆筍切段、西芹切片；
2. 牛油落鑊，將煙肉、蘆筍、西芹、洋蔥炒香，加適量清水，上蓋，燜焗10分鐘。
3. 炒勻以上材料，加入清雞湯、香葉，煮10分鐘，不時攪拌。
4. 取去香葉，將湯料倒入攪拌機磨成蓉，取出再煮沸，加鹽、胡椒粉調味，熄火後拌入鮮忌廉，撒上麵包粒即可。
貼士：
– 處理蘆筍：雙手分別拿著蘆筍頭尾部份，輕輕往下折，蘆筍會自然在比較老及嫩的中間部份斷開。將蘆筍平放砧板，用削皮刀削去較韌的外皮。若要磨蓉做湯，則較老的部份亦可一併烹煮。
– 如喜歡喝清湯，做法(3)之後加鹽、胡椒粉調味即可。